#NetWamini_awing

Lampah Teunggeu.

(Gurisa)

Teunggeu na tuntung awi celenggeu

Leungit jinis nu sayakti

Mindah warna nu sampurna

Ginding sakti di buana

Kagurat mangsa nu tohaga

Dipilucu di marcapada

Pindah ka alam buana tengah

Néang dukuh talun matuh

Bulak-balik milampah tempat

Dunya caang murup-mubyar

Tapak alam kasampurnaan

Siloka alam kanapsuan

Ngambang dina pataruman

Mancala putra mancala putri

Heuleut beurang heureut puting

Unggal mana unggal mendi

Disipuh mangtujuh-tujuh

Kedap manglima-lima

Ngawengku ka alam tujuh

Tujuh umpak-umpakanana

Datang ciptaning sajati

gayugakeun kadunyaan

Datang kadigjayaan rasa

Digjayana sabdaning kusumah

Medal wayah ninggang mangsa

Di buana panca tengah

Waras waluya panceranana

Tironan alam sajati

Mulang rasaning rasa

Tiis tintrim paripurna

Amit ngahiang kilat panjang

Sasat béda nya ringkangna

Béak kecap béak tulis

Béak pingaraneunana

pileuleuyan janur gunung

neda agung nyaparalun