#NetSajak_Awing (Sajak Sunda)

Balé Sawala Cisanti

Mihapé raga sakedap rék ngalenyap sakerejep di puseur peuting

Sabot saré ieu bugang geus nyangsaya di kulah sédong

Nu nyangkerodong lebah liang panonoban sandékala

Dironom onom di riung careuh jeung ganggarangan

Teu kungsi lila ngéng kadéngé aya gentra nu saru jeung

sora mariem di Paléstin

Mihapé leuweung Kula ulah digunasika!

Aweuhanana sanggup ngagéré ceuli badak budeg nu pareng ngaliwat

Ngarungkadkeun catang jeung pangpung maruragan

Hirup manusa mung sarénghap ambekan jeung sajeungkal taneuh beureum

Angen-angen manusa sarakah taya béakna lir alam kubur nu tara pinuh-pinuh

Leuir pati lalaunan ngadeukeutan alam kubur nu hamo méré lolongkrang

Ngaruang sésa-sésa kahayang nu nyaliara ka saban lulurung

Nu baris ngaluluh bugang nu kalimpudan getih jeung nanah

Tulang-taléngna  nu locot  témbong lalocotan hiji-hiji 

Paténgtongan pabaur jeung tulang ajag bangbarongan

Ngahunyud balitungan bauna nyangreud hégak

Digulung taneuh beureum pabaur taneuh pétrun

Usum ngijih can kasilih usum dangdangrat can kaliwat

Meupeuh cadas jebul Cikahuripan langgeng ti cungap

Ngocor ngahuluwotan ti handapeun caringin rungkad

Mun kaduga seja ngalongok kebon kanari pelak kamari

Ngalanglang tangkal kondang nu tacan ka ijir pijangkungeunana

Ngaroris sirung rungkun mapay-mapay gebay akar kiara

Miara areuy-areuy gulantungeun owa jeung lutung

mapag gebur balébat luhureun makota Gunung wayang

Geusan nyambuangkeun katingtriman tujuh sirah cai

Ngalawungkeun asih bumi jeung langitna

Ngahiliwirkeun angin nyingraykeun halimun jeung cireumis

Pikeun mépéndé jemplingna Situ Cisanti ratusan windu.